خطوات شراء جهاز البوتاجاز

خطوات شراء جهاز البوتاجاز

كتب صفاء مجدي

مين كان يعرف إن قرار شراء البوتاجاز صعب للدرجة دي!

البوتاجاز بالنسبة لي كان طول عمره مجرد صندوق مربع جميل صاج، زمان كان لونه أبيض وصغير نسبيًا وبعدين بقى أسود واستانلس لما ماما غيرت البوتاجاز وجابت واحد جديد. مكنتش متخيلة إن اختيار البوتاجازات له أسس كتير أوي فهمتها لما نزلت بنفسي لأول مرة أشوف البوتاجازات وأسأل واستكشف مميزات وعيوب كل نوع البوتاجاز، واعرف الفرق بين البوتاجاز العادي والبوتاجاز البلت إن وكمان البوتاجاز الغاز والكهرباء والعيون.. والمقال دة كان النتيجة، لو هتشتري بوتاجاز جديد سواء كنتوا عرسان جداد أو بتجديده مطبخكم محتاجين  تجوبه على شوية أسئلة جمعنها لكوا هنا.

السؤال الأول: اشتري بوتاجاز عادي ولا بلت إن؟

• البوتاجاز العادي هو الوحدة الكاملة اللي فيها فرن وعيون بوتاجاز، وهو البوتاجاز اللي تقريبًا عند أمهاتنا كلنا.
• البوتاجاز البلت إن فهو حاجة جديدة علينا إلى حد ما.
• هو بالظبط عبارة عن بوتاجاز وفرن منفصلين جوا المطبخ، وانتشر بعد زيادة برامج وقنوات الطبخ اللي الشيف دايمًا بيطبخ فيها على بوتاجاز مسطح في قلب رخامة المطبخ. البوتاجاز البلت إن منتشر من زمان في أوربا وأمريكا وبيستخدموا خصوصأ في المطبخ الأمريكي اللي هو بيكون مفتوح على الصالة.

 لمعرفة شكل وسعر البوتاجاز العادي على ياقوطة

بوتاجاز عادي بالشعلة

 لمعرفة شكل وسعر البوتاجاز البلت إن على ياقوطة

بوتجاز بلت إن كهرباء

مميزات وعيوب البوتاجاز البلت إن والبوتاجاز العادي

السعر

• من حيث السعر فمنقدرش نقول مين أغلى أو أرخص؛ لأن فيه بوتاجازات عادية بـ 8000 جنيه زي ما فيه بوتاجاز بلت ان بـ 5000 جنيه بس. الموضوع في الحالتين بيتوقف على ميزانيتك اللي مخصصاها لشراء البوتاجاز.
• لكني ميالة شوية للبوتاجاز العادي في النقطة دي يمكن عشان انتي بتشتري بوتاجاز بعيون وكمان فرن على عكس البلت إن اللي بتدفعي فيه تمن العيون والفرن منفصلين.
• في نفس الوقت كل ست أدرى باستخدامها للبوتاجاز، يعني واحدة استخدامها للفرن أكتر من عيون البوتاجاز والعكس.

الشكل

بوتاجاز بلت إن كهرباء

• لما نزلت اتفرجت بصراحة عجبني شكل البوتاجازات العادية أكتر من البلت إن لكن في نفس الوقت الأشكال الملونة الجديدة النازلة زي لاجيرمانيا وغيرها كانت أسعارها غالية جدا من 8000 وأنت طالع وتقدري تشوفيها على ياقوطة.
• بس في شكل المطبخ ككل البلت إن بيكون شكله أشيك لأنه مش هياخد مساحة.
• البلت إن بيكون أسهل في التنضيف.
• في المطبخ الصغير كتير بيفضل البوتاجاز البلت إن عشان المساحة، وهي حاجة تحدديها على حسب مساحة مطبخك.

المساحة

• طبعا البلت إن يكسب في الحتة دي.
• البوتاجاز البلت إن؛ مش بيزود أي مساحة خالص في المطبخ وبيكون مثالي للمطابخ الصغيرة نسبيًا.
• على عكس البوتاجاز العادي وخصوصا الـ 5 شعلات اللي بياخد مساحة كبيرة نسبيا في المطبخ.

التركيب

• تركيب البوتاجاز العادي سهل جدًا وأي صنايعي هتجيبيه هيكون فاهم في الحتة دي على عكس البلت ان.
• بوتاجازو فرن البلت إن بتحتاجي تفصلي المطبخ بالكامل على حسب مكانهم.
• ولما دورت وسألت كام حد لقيت ستات اشتكت من فكرة توصيل الغاز وإن لو وصلة الغاز للبلت ان متظبطتش كويس – عشان الصنايعي مش شاطر – دا بيسبب مشاكل كتير في البوتاجاز وقوة شعلته.
• نصيحة ياقوطة: إنك ضروري تعتمدي على فني  أو متخصص من شركة الغاز عشان تركيب الغاز للبوتاجاز أو صيانة تركيبة الغاز ودا عامل أمان مهم.
• عموما لو حبيتي تشتري البلت إن يبقى تشتري البلت ان الأول ومن بعده المطبخ وتجيبي صنايعي شاطر يكون وصل بوتاجاز بلت إن قبل كده عشان يركب لك الغاز.

الوظائف

فرن بلت إن

• البوتاجاز العادي فيه عيون وكمان فرن.
• البوتاجاز البلت إن عيون لوحدها، وبعدين تشتري الفرن لوحده، ودي ميزة عشان ممكن تحطي البوتاجاز في حته والفرن في حته تانية، وبكدا تقفي براحتك أدام البوتاجاز من غير ما تتضايقي من سخونية الفرن.
• الفرن في الحالتين: ممكن تختاري حجمه، والميزة في البلت إن إنك مش مقيدة تجيبه في نفس حجم البوتاجاز بمعنى إنك ممكن تجيبي بوتاجاز صغير و فرن كبير أو العكس ودا بيكون على حسب استخدامك للفرن قليل أو كتير. وكمان ممكن البوتاجاز يكون غاز والفرن عادي أو العكس، ودي مميزات مش موجودة في الفرن البوتاجاز العادي عشان بيكون الفرن والبوتاجاز مدمجين سوا.
• نصيحة الخبيز بيكون أحسن في الفرن الكهرباء عشان بتقدري تظبطي درجة الحرارة بالظبط وكمان اتجاه الحرارة.

في حالة قرارك لشراء البوتاجاز البلت إن هيقابلك سؤال تاني:

السؤال التاني: أجيب البلت إن السيراميك التاتش الكهرباء ولا البلت إن العادي الغاز؟

• النقطة دي الستات جاوبت عليها وقالوا البوتاجاز البلت إن العادي أحسن.
• فيه تجارب مع البوتاجازالبلت إن السيراميك إنه بيبوظ بعد شوية أو بيتجرح وكمان التاتش مرات بيبوظ وصعب تلاقي اللي يصلح التكنولوجي المتقدمة دي في مصر وغالبًا هيكلف كتير في تصليحه.
• لكن في الناحية التانية مقابلتش أي شكاوي من الستات اللي استعملت البلت إن العادي.
• بس برضه لازم نكون حقانين البلت إن السيراميك الكهرباء هايل في نضافته وفي شكله المودرن اللي بيغير شكل المطبخ كُليًا.
• خالي بالك وأنتي بتشتري إن يكون نوع الزجاج مضاد للكسر ويكون في ضمان ضد الكسر.

السؤال التالت: كهرباء ولا غاز؟

بوتاجاز غاز

• من تجربتي الشخصية مع فرن وبوتاجاز كهربا أقدر أقولك الغاز احسن.
• لأن البوتاجاز الكهرباء بياخد وقت أطول شويه عشان يسخن وكمان وبمجرد وصوله درجة الحرارة بيفصل، وكنت دايمًا أعلى على درجة الحرارة المطلوبة درجة أو اتنين عشان أخلي البوتاجاز يسخن أسرع.
• الفرن الكهرباء يمكن مبياخدش نفس الوقت زي البوتاجاز وبيسوي الأكل كويس جدًا بس لما استخدمته كل يوم في عمل الغدا فاتورة الكهربا كانت عالية شويه من الفاتورة اللي متعودين عليها.
• الفرن الكهرباء بيسوي الأكل أحلى وبالذات في الخبيز.
• بس طبعا تاخدي بالك وانتي بتشتري من عوامل الأمان في البوتاجاز وتتأكدي إنه بيفصل الغاز في حالة انطفاء النار وخصوصًا لو فيه عندك أطفال في البيت.

السؤال الرابع: بوتاجاز 5 شعلة ولا بوتاجاز 4 شعلة؟

• السعر

قرارك في الحتة دي بيتوقف على استخدامك، الفرق في السعر بين الاتنين مش كبير اوي.

أسعار البوتاجاز الـ 4 شعلة في مصر، بتبدأ من حوالي 1400 جنيه مصري.

أسعار البوتاجاز الـ 5 شعلة في مصر، بيبدأ من 1500 جنيه مصري.

في أسعار بتزيد كتيرعن كده وممكن توصل لحد 8000 جنيه وأكتر و دي تحدديها على حسب الحاجة والاستخدام، لكن برده تقدري تجيبي حاجة كويسة بتمن معقول.

• طريقة استخدامك للبوتاجاز

فكري في استهلاكك انتي للبوتاجاز؟

• هل بتطبخي كميات كبيرة وبتستخدمي حلل كبيرة بس بعدد قليل؟ يبقى هاتي الـ4 شعلات.
• هل حللك مش واسعة نسبيا وممكن تترص على 5 شعل كلهم جنب بعض؟ يبقى هاتي الـ 5 شعلات.
• كان نزل كمان في السوق 6 شعلات ولكنه مش عملي، عشان الحلل بشكلها الضيق من تحت وواسع من فوق أو الحلل الكبيرة مش هتساع بعضها على الـ 6 شعلات.

لو جاوبتي على الأربع أسئلة اللي فاتت دي فأنتي خلاص عرفتي مواصفات جهازك.

 دي شوية نصايح من الستات تاخدي بالك منها وانتي بتشتري البوتاجاز

1. خلي بالك من التفاصيل الصغيرة ومميزات البوتاجاز اللي بتشتريه زي مثلًا ذاتي الاشعال ولا لأ؟ سهل التنظيف؟ مروحة الفرن كويسة؟ الشواية والفرن بيشتغلوا سوا ولا لأ؟ فيه تايمر للفرن؟
2. أحسن الأنواع في السوق دلوقتي واللي معظم مستخدمي ياقوطة رشحوا هو النوع الإيطالي واللي يمكن أسعارها عالية شوية لكنها هتعيش معاكي.
3. خللي بالك من نوع حامل الأواني وحددي الأول هل هو مناسب لنوع الحلل اللي عندك ولا لأ؟ يعني مثلًا بيكون حديد ودا بيستحمل أكتر وبيكون ثابت أكتر ولكن تنضيفه ممكن يكون أصعب. وفي نوع بيكون معدن أخف شوية و دا مش بيكون ثابت أوي مع الحلل الكبيرة بالذات لكن تنضيفه أسهل وطبعًا البوتاجاز السيراميك تنضيفه أسهل وثباته مضمون أوي لأنه مسطح.
4. الشفاط حاجة مهمة جدًا خصوصًا في المطبخ المفتوح عشان لما تطبخي متقلبيش ريحة البيت كله.. يُفضل أن يكون الشفاط أكبر مساحة من البوتاجاز كله مش بس من فوق، وعمومًا الشفاطات الجديدة شكلها حلو.
5. ممكن تشوفي الشفاطات من هنا وسعرها يبدأ من  799 جنيه مصري.

شفاط للمطبخ

وأخيرًا قبل ما تنزل تلف في المحلات وفر على نفسك الوقت وشوف الأسعار والموديلات المختلفة للبوتاجازات على ياقوطة.